އައިޖީއެމްއެޗްގައި މަސައްކަތް ކުރަމުންދިޔަ ފިލިޕީންސްގެ ހީވާގި ނަރުސް މޭރީ ގްރޭސް އޮކްޓޫބަރު 2021 ގައި ކުއްލި ގޮތަކަށް މަރުވި ހާދިސާގެ ފަހަތުގައި އަމަލީ ގޮތުން ބައިވެރިވި އޭނާގެ ފިރިމީހާ މާވިން އެސްވައި (މިހާރުގެ ނަމުން ޔޫސުފް) ގެ މައްޗަށް ކުށް ސާބިތުވާ ކަމަށް ކަނޑައެޅުމަށް ފަހު، އެކަމުގައި ބައިވެރިވި ދިވެހި ނަރުސް ހަލީމަތު ލަމްހާގެ މައްޗަށް ވެސް ކުށް ސާބިތުވާ ކަމަށް ކޯޓުން ނިންމައިފިއެވެ.
ދައުލަތުން ކޯޓުގައި ސާބިތުކޮށްދިން ގޮތުގައި، މި މަރުގެ އަސްލަކީ މާވިން އާއި ލަމްހާއާ ދެމެދު އޮތް ސިއްރު ލޯބީގެ ގުޅުމެވެ. މޭރީގެ ދިރިއުޅުން ދުއްވާލުމަށް ފަހު އެކުގައި އުޅުމަށްޓަކައި މި ދެ މީހުން ރޭވި ރޭވުމުގެ ދަށުން، މޭރީއަށް ހަމަލާދީ މަރާލީ ސީދާ މާވިން އެވެ. އަދި ކުށުގެ ހެކި ފޮރުވުމުގެ ގޮތުން މޭރީ މަރުވީ އަމިއްލައަށް ދަންޖެހިގެން ކަމަށް ދައްކަން މާވިން މަސައްކަތް ކުރި އިރު، އެ ވަގުތު މޭރީގެ ކުޑަކުޑަ ދަރިފުޅު ގޮވައިގެން އެހެން ގެއަކަށް ގޮސް އެ ކުއްޖާ ބެލެހެއްޓުމާ ހަވާލުވީ ލަމްހާ އެވެ.
މި މައްސަލައިގެ ޝަރީއަތް ހިނގަމުންދިޔަ ދުވަސްވަރު ކްރިމިނަލް ކޯޓުން ލަމްހާ ބަންދުން ދޫކޮށްލި ނަމަވެސް، ދައުލަތުން އެ މައްސަލަ އިސްތިއުނާފް ކުރުމުން ހައި ކޯޓުން ވަނީ އޭނާ އަލުން ބަންދުކުރަން އަމުރުކޮށްފަ އެވެ. މި ނިންމުމާއެކު، މޭރީގެ މަރުގެ އިންސާފަށް އެދި ގޮވަމުންދިޔަ ގިނަ ބަޔަކަށް މިވަނީ ބޮޑު ހިތްހަމަޖެހުމެއް ލިބިގެން ގޮސްފަ އެވެ.
ކޮމެންޓް
އަދި އެއްވެސް ކޮމެންޓެއް ނެތް.