ހުޅުމާލެ ދެވަނަ ފިޔަވަހީގެ ހިއްކި ބިމެއް ކަމަށްވާ ފަރުކޮޅުފުށި ސަރަހައްދުގައި ހިންގި ނުރައްކާތެރި މާރާމާރީއާ ގުޅިގެން ހައްޔަރުކުރި ޒުވާނާގެ ބަންދަށް ކޯޓުން ފަސް ދުވަސް އިތުރުކޮށްފިއެވެ.
ފުލުހުން މިއަދު ހާމަކުރި ގޮތުގައި، މި ހާދިސާގައި ތުހުމަތުކުރެވޭ 21 އަހަރުގެ މީހާ ހައްޔަރުކޮށްފައިވަނީ އޭނާއަށް ލިބުނު އަނިޔާތަކަށް ހޮސްޕިޓަލުން ފަރުވާދިނުމަށްފަހު ދޫކޮށްލި ވަގުތުއެވެ۔ އޭނާގެ ބަންދުގެ މުއްދަތު ޖަހާފައިވަނީ މުއްދަތު އިތުރުކުރުމަށްޓަކައި ކޯޓަށް ހާޒިރުކުރުމުންނެވެ۔
އިއްޔެ އިރުއޮއްސި 6:30 ހާއިރު ހިނގި މި ހަމާލާގައި އަނިޔާވި މީހުންގެ ތެރޭގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ ޑިރެކްޓަރެއްގެ މަގާމުގައި ހުންނެވި އިސްމާއިލް އަބްދުއްރަހީމް (އިސޫ) ހިމެނެއެވެ۔ މި މާރާމާރީގައި އިސޫގެ އިތުރުން ދެން އަނިޔާވެފައިވަނީ މި މައްސަލާގައި ފަހުން ހައްޔަރުކުރި ޒުވާނާއަށެވެ۔ މި ދެ މީހުންނަށްވެސް ހޮސްޕިޓަލުގައި ފަރުވާދީފައިވާއިރު، ދެމީހުންގެ ހާލުވެސް ސީރިއަސް ނޫންކަމަށް މައުލޫމާތު ލިބެއެވެ۔
މި މާރާމާރީ ހިންގަން މެދުވެރިވި އަސްލު ސަބަބެއް ފުލުހުން އަދި ހާމައެއް ނުކުރެއެވެ۔ ނަމަވެސް ފުލުހުން ދަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި އިތުރަށް ތަހުގީގު ކުރަމުންނެވެ۔ އިސޫ އަކީ މީގެ ކުރިންވެސް ނޫސްވެރިޔާ ރިލްވާނާއި ބްލޮގަރ ޔާމީން ރަޝީދުގެ މަރުގެ މައްސަލައިގެ ތުހުމަތުގައި ހައްޔަރުކޮށް، ދައުވާ ސާބިތުނުވެގެން ދޫކޮށްލާފައިވާ މީހެކެވެ۔
ކޮމެންޓް
އަދި އެއްވެސް ކޮމެންޓެއް ނެތް.