އެޕަލްގެ ޗިޕްތައް އެމެރިކާގައި އުފެއްދުމަށް އިންޓެލްއާއެކު އެއްބަސްވުމެއް!

ޓެކްނޮލޮޖީގެ ދުނިޔޭގައި މިހާތަނަށް ފެނިގެންދާނެ އެންމެ ބޮޑު އެއް ބަދަލު ގެނައުމަށް މަޝްހޫރު އެޕަލް ކުންފުނިން  ތައްޔާރުވެއްޖެއެވެ. 

އެމެރިކާގެ ރައީސް ޑޮނަލްޑް ޓްރަމްޕް ހާމަކުރެއްވި ގޮތުގައި، އެޕަލް އިން މިހާރު ވަނީ އިންޓެލް ކުންފުންޏާއެކު އެމެރިކާގެ ފަސްގަނޑުގައި މައިކްރޯޗިޕް ފަރުމާކޮށް އުފެއްދުމަށް ބޮޑު އެއްބަސްވުމަކަށް އައިސްފައެވެ.

މި ނިންމުމަކީ މިހާތަނަށް ޓައިވާނުގެ ޓީ.އެސް.އެމް.ސީ ކުންފުންޏަށް ބަރޯސާވެގެން އޮތް އޮތުން ނިމުމަކަށް ގެނައުމަށް އެޕަލް އިން އެޅި ވަރުގަދަ ފިޔަވަޅެކެވެ. އާޓިފިޝަލް އިންޓެލިޖެންސް (އޭއައި) ގެ ބޫމްއާއެކު އެންވިޑިއާ އާއި އޭއެމްޑީ ފަދަ ކުންފުނިތަކުގެ ޑިމާންޑް ބޮޑުވެ، ޓީއެސްއެމްސީގެ އުފެއްދުންތެރިކަން ފުރިފައިވުމަކީވެސް އެޕަލް އިން މިފަދަ އެހެން މަގެއް ހޯދަންޖެހުނު މައިގަނޑު އެއް ސަބަބެވެ.

މި އެއްބަސްވުމުގެ ސަބަބުން މާލީ ބާޒާރުގައި ބޮޑެތި ލޮޅުންތަކެއް ވަނީ އަރާފައެވެ. ޓްރަމްޕްގެ މި އިޢުލާނާއެކު އިންޓެލް ކުންފުނީގެ ހިއްސާގެ އަގު ވަގުތުން 10 އިންސައްތައަށްވުރެ މައްޗަށް އަރައިގެންދިޔައެވެ. މިއީ ދާދިފަހުން މާލީގޮތުން ބޮޑެތި ގޮންޖެހުންތަކަކާ ކުރިމަތިލާންޖެހިފައި އޮތް އިންޓެލްއަށް ލިބުނު ވަރަށް ބޮޑު ދިރުމެކެވެ. އަނެއްކޮޅުން އެމެރިކާ ސަރުކާރުން މިދިޔަ އަހަރު ވަނީ އިންޓެލްގެ 10 އިންސައްތަ ހިއްސާ 8.9 ބިލިއަން ޑޮލަރަށް ބައްލަވައިގެންފައެވެ. އެހެންކަމުން މި އެއްބަސްވުމަކީ އެމެރިކާގެ އަމިއްލަ ފަސްގަނޑުގައި ޓެކްނޮލޮޖީގެ އުފެއްދުންތެރިކަން ކުރިއެރުވުމަށް ސަރުކާރުން ކުރަމުންދާ މަސައްކަތަށް ލިބުނު ވަރަށް ބޮޑު ކާމިޔާބީއެކެވެ.

މި އާ ޕާޓްނަޝިޕްގެ ދަށުން އުފައްދާނީ ސީދާ ކޮން ޗިޕްތަކެއްކަން ދެ ކުންފުނިން އަދި ރަސްމީކޮށް ހާމަކޮށްފައެއް ނުވެއެވެ. ނަމަވެސް ޓެކްނޮލޮޖީގެ މާހިރުން ލަފާކުރާ ގޮތުގައި، މި މަޝްރޫޢުގެ އަމަލީ މަސައްކަތް ނިމި ބާޒާރަށް ޗިޕްތައް ނެރެވޭވަރު ވާނީ 2027 ނުވަތަ 2028 ވަނަ އަހަރުއެވެ. ފެށުމެއްގެ ގޮތުން އެޕަލްގެ އެންމެ ފަހުގެ އައިފޯނުތަކުގެ ޕްރޯ މޮޑެލްތަކުގެ ބަދަލުގައި، އިންޓެލް އިން އުފައްދާނީ އައިޕެޑް ނުވަތަ ބޭސިކް މެކްބުކްތަކަށް ބޭނުންވާ ކުރީގެ މޮޑެލްތަކުގެ މެކް ޗިޕްތަކެވެ. އެޕަލްގެ އެންމެ މަތީ ފެންވަރުގެ ޗިޕްތައް އުފެއްދުމުގައި އަދިވެސް އިސްކަންދޭނީ ޓީ.އެސް.އެމް.ސީ އަށެވެ. ނަމަވެސް މިއީ އެޕަލްގެ އުފެއްދުންތައް މުސްތަޤުބަލުގައި އެމެރިކާގައި ބިނާކުރުމަށް އެޅުނު ވަރަށް މުހިންމު ބިންގަލެކެވެ.