މާލޭގައި އާންމު އުނދަގޫކުރާނަމަ ޖޫރިމަނާ ކުރުމާބެހޭ ގަވާއިދަށް ޚިޔާލު ހޯދަނީ

ގަވައިދުގައިވާ ގޮތުން މި ފަދަ އަމަލުތައް ހިންގާ މީހުންނާ މެދު ފުރަތަމަ ފިޔަވަޅެއްގެ ގޮތުން ލިޔުމުން ނަސޭހަތް ދޭނެ އެވެ. އެއަށް ފަހު އިޖްތިމާއީ އަމުރު ނެރެ އަދި އެންމެ ފަހުން ޖޫރިމަނާގެ ނޯޓިސް ފޮނުވުމަށް ވެސް ވަނީ ހަމަޖެހިފަ އެވެ. މިގޮތުން ކުނިއަޅަން ނުޖެހޭ ތަންތަނަށް ކުނި އަޅައިފި ނަމަ، ނޯޓިސްދީ 500 ރުފިޔާއިން ޖޫރިމަނާކުރާނެ އެވެ. އަދި މިފަދަ އަމަލެއް ހިންގުމުން ނަސޭހަތެއް ނުވަތަ ނޯޓިސް ދިނުމަށް، ނުބައި އެޑްެރެހެއް ނުވަތަ މައުލޫމާތެއް ދީފި ނަމަ، 2،000 ރުފިޔާއިން ޖޫރިމަނާކުރުމަށް ވަނީ ކަނޑައަޅާފަ އެވެ. މަގުމައްޗަށް ވެއްޓިދާނެ ފަދަ ގޮތަކަށް އިމާރާތްތަކުގެ ޓެރަސް އަދި ބެލްކަނިތަކުގައި ގަސްމުށި ބަހައްޓާ ނަމަ، ރަނގަޅު ކުރުމަށް ތިން ދުވަހުގެ މުހުލަތެއް ދޭނެ އެވެ. އެ މުއްދަތުގެ ތެރޭގައި ރަނގަޅު ނުކޮށްފި ނަމަ 5،000 ރުފިޔާއިން ޖޫރިމަނާކުރާނެ އެވެ. އަދި އެ މުއްދަތުގައި ވެސް ރަނގަޅު ނުކޮށްފި ނަމަ، 15،000 ރުފިޔާއިން ޖޫރިމަނާކުރާނެ އެވެ.

މީގެ އިތުރުން ސިޓީ ކައުންސިލްގެ ބެލުމުގެ ދަށުގައިވާ ޕާކުތަކާއި، މައިޒާންތަކާއި، މިސްކިތްތަކާއި ބިންތަކުން މާ ބިނުމާއި ގަސްތަކަށް ގެއްލުން ދިނުމާއި މިސްކިތުގައި ނިދައި ފެންވަރައި ހެދުން ވެސް މި ގަވައިދުން މަނާކުރެ އެވެ. އެފަދަ ކަމެއް ކުރާ ނަމަ ފުރަތަމަ ފަހަރު 100 ރުފިޔާއިން ޖޫރިމަނާކޮށް، ތަކުރާރު ކުރާ ކޮންމެ ފަހަރަކު 500 ރުފިޔާއިން ޖޫރިމަނާ ކުރާނެ އެވެ. އަދި ކެފޭ ނުވަތަ ރެސްޓޯރެންޓުތަކާއި ކުޅިވަރު ކުޅޭ ފަދަ ތަންތަނުގައި، އާންމު އުނދަގުލަކަށް ވާގޮތަށް ބާރަށް ލަވަ ޖަހައި އަޑުގަދަކޮށް ޓީވީ ބަލާނަމަ އެކަން ރަނގަޅު ކުރަން 15 މިނިޓްގެ ވަގުތުކޮޅެއް ދޭނެ އެވެ. އެ ފުރުސަތުގައި އެކަން ނުހުއްޓައިފި ނަމަ، 500 ރުފިޔާއިން ޖޫރިމަނާ ކުރާނެ އެވެ. މި ގަވައިދުގެ ދަށުން ކުރާ ޖޫރިމަނާ ނުދައްކައިފި ނަމަ ކޯޓަށް ގޮސްގެން އެ ފައިސާ ހޯދޭނެ ކަމަށް ވެސް ކައުންސިލުން ބުނެ އެވެ. މާލޭ ސިޓީ ކައުންސިލުން ވަނީ މި ގަވައިދާ ގުޅޭގޮތުން ހިޔާލެއް އޮތް ނަމަ، 10 ދުވަހުގެ ތެރޭގައި އެތަނުގެ ރަސްމީ އީމެއިލް އެޑްރެހަށް އީމެއިލްއަކުން ހުށަހެޅުމަށް އެދިފަ އެވެ.