ދިވެހިރާއްޖޭގައި ޓޫރިޒަމްގެ ބޭނުންތަކަށް ކުއްޔަށް ދޫކޮށްފައިވާ ރިސޯޓުތަކާއި އެހެނިހެން ބިންތަކުގެ މުއްދަތު ހަމަވުމުން، އެތަންތަން އަނބުރާ ސަރުކާރާ ހަވާލުކުރާ ސާފު މިންގަނޑުތަކެއް މިނިސްޓްރީ އޮފް ޓޫރިޒަމް އާއި ގުޅިގެން މާލީ ހިސާބުތައް ބަލަހައްޓާ މައި އިދާރާ، އޮޑިޓް އޮފީހުން އެކުލަވާލާފިއެވެ.
މި އާ އުސޫލު އެކުލަވައިލުމުގެ މައިގަނޑު މަގްސަދަކީ ކުލީގެ އެއްބަސްވުން ނިމުމަކަށް އަންނައިރު، އެތަނެއް ހިންގަން އުޅުނު ފަރާތަށް ދައުލަތުން ދޭންޖެހޭ މާލީ ބަދަލު ނުވަތަ ފައިސާގެ އަދަދުތައް ކަނޑައެޅުމުގައި ދެފުށް ފެންނަ، ސާފު ނިޒާމެއް ގާއިމުކުރުމެވެ. މީގެ ސަބަބުން މުއްދަތު ހަމަވާ ރިސޯޓުތަކުގެ އަގުބެލުމުގައި ދެން އެއްވެސް އޮޅުންބޮޅުމެއް ނުހުންނާނެއެވެ.
މި އުސޫލުގައި ބަޔާންކޮށްފައިވާ ގޮތުން، އަގުކުރުމުގެ މަސައްކަތް ކުރިއަށްދާނީ އެ ރިސޯޓެއް އޮޕަރޭޝަނަލް ހާލަތެއްގައި އޮތްތޯ ނުވަތަ ހިދުމަތް ހުއްޓިފައިވާ ތަނެއްތޯ ބެލުމަށްފަހުގައެވެ. އެގޮތުން ހިދުމަތް ދެމުންދާ ތަންތަނުގައި ހުންނަ، އަދި އެ ވިޔަފާރިއަކާ ސީދާ ގުޅުންހުރި އުފުލޭ މުދަލާއި ނުއުފުލޭ މުދާ ހިސާބުކުރާނީ ލީޒް އެއްބަސްވުމުގެ ދަށުން ގާއިމުކޮށް ސަރުކާރަށް ހުށަހަޅާފައިވާ އިންވެންޓްރީ ލިސްޓަށް ބަލައިގެންނެވެ. ނަމަވެސް ބޭނުންނުކުރެވޭ ވަރަށް ބާވެ ހަލާކުވެފައިވާ ތަކެއްޗާއި، މިނިސްޓްރީގެ ހުއްދަނެތި ހަދާފައިވާ އިމާރާތްތަކެއް މި އަގުކުރުމުގެ ތެރެއަކު ނުހިމެނޭނެއެވެ. އަދި ކުއްޔަށް ހިފި ފަރާތަށް އަމިއްލަ މުދާ ގެންދިއުމަށްޓަކައި ލީޒް ނިމޭތާ 90 ދުވަހުގެ މުއްދަތެއް ލިބޭނެކަން ޓޫރިޒަމް މިނިސްޓްރީން އަންގަންޖެހެއެވެ.
މި ހުރިހާ މުދަލެއްގެ އަގު ކަނޑައަޅައި ބަލަށް ކެނޑުމުގެ މަސައްކަތްތައް ކުރަންޖެހޭނީ ޗާޓަޑް އެކައުންޓެންޓްސް އޮފް މޯލްޑިވްސް ގައި ރަޖިސްޓްރީވެފައިވާ، އެކަމަށް ހާއްސަ ހުއްދަ ލިބިފައިވާ މިނިވަން ފަރާތްތަކުންނެވެ. މިގޮތުން ތައްޔާރުކުރާ ރިޕޯޓުތައް ހުށަހަޅަންޖެހޭނީ އޮޑިޓަ ޖެނެރަލްގެ އޮފީހަށެވެ. އަދި މި އުސޫލުގައި ސީދާކޮށް ބަޔާންކޮށްފައިނުވާ އިސްތިސްނާ ހާލަތެއް ދިމާވެއްޖެނަމަ، އެކަމެއްގައި އެންމެ ފަހުގެ ގޮތް ނިންމުމުގެ ބާރުވެސް ދީފައިވަނީ އޮޑިޓަ ޖެނެރަލަށެވެ.
ކޮމެންޓް
އަދި އެއްވެސް ކޮމެންޓެއް ނެތް.